Inzalelwane yaseMpuma Koloni edlala kwascrumhalf nakwiflyhalf uSanele Nohamba uzakuyokudlala eJapan emva kokukhululwa ziiLions zaseRhawutini emva kwemini ngoMvulo.
UNohamba, ozakusingisa eJapan kuleveki ezayo, uqinisekisile ukuba utyikitye isivumelwano seminyaka emibini neqela laseJapan iYamaha.
“ILions Rugby Company ikhulule kwangethuba uSanele Nohamba kwisivumelwano sakhe sengqesho. Lomdlali odlala kwascrumhalf uzakuqhubela phambili nokudlala eJapan,” zitshilo iiLions.
Lenzalelwane yaKwaMavuso, eDikeni, eneminyaka engamashumi amabini anesihlanu, yazibandakanya neeLions esuka kwiiSharks zaseThekwini ngoMeyi 2022.
“Ndizakusingisa kwelaseJapan kuleveki ezayo. Ndityikitye isivumelwano seminyaka emibini neYamaha,” utshilo uNohamba.
