Emveni kokungalwi isithuba esingaphaya kweminyaka emibini, ekugqibeleni intshatsheli yoMzantsi Afrika kwicandelo labasetyhini kudidi lwejunior-lightweight uNozipho Bell uzakulwa okokuqala ukususela ngoDisemba 2022 njengokuba ezakuqubisana no-Abongile Lubambo.
UBell uzakulwa noLubambo kumlo wecatchweight kwitumente esizakuyiphathelwa ngumthelekisi uDavid Faas weDavid Faas Productions eWalmer, eGqeberha, ngoMgqibelo umhla wesibhozo kuMatshi.
UBell ubeswele imilo ukususela mhla wakhusela ngempumelelo intshinga yakhe yoMzantsi Afrika ngokubetha uMashudu Ramakwelo kwiholo iBabs Madlakane, KwaNobuhle, eKariega.
“Ndingaqinisekisa ukuba uBell uzakulwa noLubambo kumlo wecatchweight. Lomlo uzakubanjelwa eWalmer ngomhla wesibhozo kuMatshi,” uqinisekise watsho uFaas.
UBell uyimbethi-manqindi enamava njengokuba ephumelele imilo elishumi elinesine, enqumamise amanina amathathu, wabethwa kwimilo emithathu, wabambana komnye. Ukanti, uLubambo uphumelele imilo emithathu, waquthiswa kwemibini, walwa ngokulingana komnye.
