Emva kokushiya iLuvuyo Boxing Club eMdantsane kulonyaka ophelileyo, u-Enathi Stelle uthe qhaphu, gqi eGauteng, apho aqeqeshwa khona nguKhangelani Jack, owaphumelela iwonga le-2023 Trainer of the Year.
Ayikuko nokokuba uStelle uziqeqesha nje ngaphantsi kwesandla sikaJack, ukwalungiselela nomlo wakhe noNdabezinhle Phiri waseZimbabwe e-Emperor’s Palace, eKempton Park, ngeCawa umhla wesibini kuMatshi.
UPhiri, ongekabethwa, yimbethi-manqindi ewuchanayo umcimbi kwanjengokuba wabonakalisayo ngethuba enqumamisa uMoyisi Booi kumjikelo wesine eMidrand ngoSeptemba nyakenye.
“UStelle ulapha, uziqeqesha nathi. Uqale ukuziqeqesha nathi kwisithuba esingaphaya kweeveki ezimbini. Ulungiselela umlo wakhe olandelayo,” utshilo uJack.
UStelle washiya iLuvuyo Boxing Club wayokuqeqeshwa yintshatsheli yamhlamnene kwiWorld Boxing Association (WBA) ne-International Boxing Organisation (IBO) kudidi losiba uSimphiwe ‘V12’ Vetyeka ngo-Agasti nyakenye. Okwangoku uStelle yinjinga yaseMpuma Koloni kudidi lwejunior-bantamweight.
Wanqunyanyiswa yintshatsheli yeWorld Boxing Organisation (WBO) kudidi lwejunior-bantamweight champion Phumelela Cafu kwimizuzwana engamashumi amabini anesithandathu kumlo wentshinga yoMzantsi Afrika ngoDisemba 2023.