UBernice ‘The Badger’ Ferreira ubona umlo wakhe noBukiwe ‘Anaconda’ Nonina njengovavanyo oluhle lwesakhono sakhe emanqindini njengokuba esisibini sasetyhini sizakulwa ngoMgqibelo.
UFerreira, ongekabethwa, uzakulwa noNonina, ongekalwi kwisithuba esingaphaya konyaka, kumlo wemijikelo emithandathu eGalleria, eSandton, eRhawutini.
“Ndiziva ndiwulungele lo mlo. Ndiziva ndisemandleni njengokuba amalungiselelo alomlo ehambe kakuhle,” utshilo uFerreira, oneminyaka engamashumi amathathu anesithathu.
UFerreira, oyintshatsheli yodidi lwejunior-lightweight kwicandelo labasetyhini eGauteng, unqwalile, evuma ukuba uzakujamelana noNonina, oyimbethi-manqindi esisisele senyathi.
UFerreira uyiphumelele yomithandathu imilo yakhe, enqumamise abasetyhini abathathu, logama uNonina ephumelele imilo engamashumi amabini, enqumamise abasetyhini abane, wabethwa kwimilo emine, waze walwa ngokulingana kwemibini.
“Unamava xa ethelekiswa nam. Uzakuba yeyona mbethi-manqindi enamava kwendakhe ndalwa nazo ukuzokuthi ga ngoku. Izakuba luvavanyo oluhle kum ukulwa nembethi-manqindi enamava njengaye,” utshilo uFerreira.
“Ukuba nje ndingakwazi ukumelana naye, lonto iyakuthetha ukuba ndizakukulungela ukuntingela phezulu ndide ndicele umngeni kwintshinga yoMzantsi Afrika. Injongo yam ephambili kukulwela intshinga yoMzantsi Afrika.”
Kusenjalo, lo ngumlo wokuqala kaNonina kususela mhla walwa ngokulingana noChiedza Homakoma waseZimbabwe ngoSeptemba 2023, logama uFerreira wabetha uSinesipho Mve ngoJuni kulonyaka ophelileyo. – Monwabisi Jimlongo
