Ibuyela emanqindini iRumble Africa Promotions (RAP) emva kokungabikho isithuba esingaphaya konyaka ngenxa yokuxakeka kosihlalo wayo uTeris Ntutu.
IRAP yagqibela ukwenza itumente ngethuba intshatsheli yamhlamnene kwi-International Boxing Federation (IBF) kudidi lwejunior-flyweight uSivenathi ‘Special One’ Nontshinga ekhusela ngempumelelo intshinga yakhe kumlo noRegie Suganob wasePhilippines e-International Convention Centre (ICC), eMonti, ebutsheni bukaJulayi 2023.
“Ndizakufaka isicelo sempepha zokuthelekisa kulonyaka. Sele ndimxelele noMandla Ntlanganiso ukuba ndiyabuya,” utshilo uNtutu exelela i-Ink Sport.
Emva kokusingatha iitumente ezingamashumi amabini anesithathu ukususela kwitumente yayo yamazibulo ngoDisemba 2014, iRAP yazakhela igama emanqindini ngokuvulela indlela namathuba iimbethi-manqindi ezininzi kuquka noNontshinga.
Lomfana oneminyaka engamashumi amabini anesithandathu nowaphumelela intshinga ye-IBF kudidi lwejunior-flyweight izihlandlo ezimbini, waqala ukulwa kwitumente yeRAP ngethuba wayebetha uSandile Wessels kumlo owawuse-Orient Theatre, eMonti, ngoDisemba 2017.
Ngenxa yamalinge ayo, iRAP yaphumelela iwonga le-IBF Continental Africa Promoter of the Year iminyaka emibini – 2018 and 2019 – ilandelelana. IRAP yaphinda yawongwa ngewonga le-2022 IBF Most Active Promotion in Africa. – Monwabisi Jimlongo
