Emva kokubuya noboya bentenetya kwimilo yakhe emithathu yokugqibela, uThabiso ‘The Rock’ Mchunu ufumana elinye ithuba lokubuyisela isidima sakhe njengoko ezakulwa no-Amador Kalonji ePitoli ngosuku lwabasebenzi.
UMchunu, oyintshatsheli yoMzantsi Afrika kudidi lwecruiserweight, ulwa noKalonji waseDemocratic Republic of Congo (DRC) eSunBet Arena, eTime Square, ngoLwesine umhla wokuqala kuMeyi.
UMchunu, oyinzalelwane yaKwaXimba, ubethwe nguMuslim Gamzatovich Gadzhimagomedov, uYamil Alberto Peralta no-Ilunga Makabu kwimilo yakhe emithathu yokugqibela.
Ukanti, uKalonji, ozinze eStrand eKapa nokwayinjinga yeWorld Boxing Federation (WBF) All-Africa kudidi lwecruiserweight, wanqumamisa uSandiso Kota kumjikelo wesithandathu ngo-Agasti nyakenye.
Kusenjalo, uLindokuhle Khuzwayo, oyiphumelele yomihlanu imilo yakhe, enqumamise amadoda amathathu, uzakube elinga ukuqhubela phambili nokuphumelela xa esilwa noSithembiso Maduna.
UKhuzwayo uzakuya kumlo noMaduna emva kokubetha uSonwabile Marenene e-Orient Theatre, eMonti, ngoDisemba kulonyaka ophelileyo. Yena uMaduna, ophumelele imilo elishumi elinesibini, enqumamise amadoda amabini, wabethwa kahlanu, ubethwe ngu-Ardy Katompa waseDRC ngo-Agasti.
Lemilo mibini iyinxalenye yetumente yeLegacy Boxing Promotions, apho uKevin Lerena azakuyikhusela okokuqala intshinga yakhe yeWorld Boxing Council (WBC) kudidi lwebridgerweight xa esilwa nommi wase-Ukraine uSerhiy Radchenko.
