Ukolula irekhodi lakhe lokungabethwa nokunyukela ngentla kuluhlu lweembethi-manqindi ezikudidi losiba zizinto azakuzijonga ngamehlo abomvu uLindokuhle Khuzwayo xa esilwa noSithembiso Maduna kwisithuba esingaphantsi kweenyanga ezimbini.
Ephumelele imilo emihlanu, enqumamise amadoda amathathu, uKhuzwayo uzakungquzulana noMaduna eSunBet Arena, eTime Square, ePitoli, ngoLwesine umhla wokuqala kuMeyi.
“Ndiziva ndisemandleni, ndikulungele ukulwa nanini na. Okokoko ndisebenza nzima kwangaphambi kokuba uqinisekiswe lo mlo,” utshilo uKhuzwayo, obekwa kwindawo yesine eMzantsi Afrika.
UKhuzwayo wongeze ngelithi: “Sijonge ukunyuka kuluhlu lweembethi-manqindi. Kudala uMaduna ekhona emanqindini, kwaye andisoze ndimdelele. Unemilo eliqela, kwaye unamava xa ethelekiswa nam. Ndizakuzijula ijacu kulo mlo.”
UKhuzwayo uya kumlo wakhe noMaduna emva kokuquthisa uSonwabile Marenene e-Orient Theatre, eMonti, ngoDisemba kulonyaka ophelileyo.
Kwelinye icala, uMaduna, ophumelele imilo elishumi elinesibini, enqumamise amadoda amabini, ebethwe kwahlanu, wabethwa ngu-Ardy Katompa waseDemocratic Republic of Congo (DRC) ngo-Agasti nyakenye.
Kusenjalo, lo mlo ophakathi kwezimbethi-manqindi ezimbini yinxalenye yetumente yeLegacy Boxing Promotions, apho intshatsheli yeWorld Boxing Council (WBC) kudidi lwebridgerweight uKevin Lerena ezakuyikhusela okokuqala intshinga yakhe kumlo noSerhiy Radchenko wase-Ukraine. – Monwabisi Jimlongo
