Kutsho kwexibilili ku-Azinga ‘Golden Boy’ Fuzile negqiza lakhe emva kokuba ngelingeni eyifumene imvume yokundwendwela kwelaseKazakhstan kulandela amantsintsintsi phakathi kwenkampu yakhe nabasemagunyeni eKazakhstan.
Ngoku, uFuzile uzakundulukela kwelaseKazakhstan ngaphambi komlo wakhe noSultan Zaurbek kwintshinga yeWorld Boxing Association (WBA) Continental kudidi lwejunior-lightweight. Lo mlo phakathi koFuzile, oneminyaka engamashumi amabini anesibhozo, noZaurbek uzakubanjelwa eBarys Arena, e-Astana, ngoMgqibelo kuleveki ezayo.
UFuzile, uZolani Tete noLonwabo Witbooi bazakuntingela eKazakhstan ngempelaveki, logama umlawuli wakhe uMlandeli Tengimfene noXolani Mampunye weLast Born Boxing Promotions bazakunikela uMzantsi Afrika umva ngoMvulo kuleveki ezayo.
“Sizifumene iivisa. U-Azinga uhamba kulempelaveki kunye noZolani noLonkie,” uqinisekise watsho uTengimfene.
Ukuhamba kukaTengimfene noMampunye kuzakulibaziseka ngenxa yokuxakeka kwabo kwitumente yeLast Born Boxing Promotions ngeCawa.
Kusenjalo, uZaurbek uyimbethi-manqindi ewuchanayo umcimbi njengokuba enqumamise amadoda alishumi elinesithathu kumaxhoba akhe alishumi elinethoba awabethileyo.
UZaurbek, oneminyaka engamashumi amabini anesibhozo, uzakulwa okokuqala ngqa kwilizwe lokuzalwa kwakhe kususela ngoDisemba 2021. – Monwabisi Jimlongo
