Owayeyintshatsheli yehlabathi uCassius ‘The Hitman’ Baloyi usengxakini enkulu njengokuba iziko lerhafu lisithi utyala iSouth African Revenue Services (SARS) phantse amakhulu asibhozo amawaka eerandi.
UBaloyi, oneminyaka engamashumi amahlanu nowaphumelela iintshinga zehlabathi eziliqela, ujamelene netyala elingamakhulu asixhenxe namashumi amathathu anesixhenxe awamawaka namakhulu amahlanu anamashumi amathathu anesithandathu eerandi neesenti ezilishumi elinesibhozo.
Eyona nto efika ibeyingxaki kukuba uBaloyi, owaphumelela intshinga ye-International Boxing Federation (IBF) kudidi lwejunior-lightweight izihlandlo ezimbini, akanayo lemali engaka ayityala iziko lerhafu.
“Ingxaki yam inoSARS, ndimtyala imali eninzi, endingayaziyo. Kwakukho ixesha apho uBSA wayelawulwa nguKrish Naidoo, apho weza khona nomthetho owawusithi bazakusihlawulela ngokwabo irhafu. Ndandizihlawulela irhafu, kwaye ndandingatyali nesenti ngaphambi kokubakho kwaloomthetho,” utshilo uBaloyi.
“ULoyiso Mtya wangena elulawulweni emveni kokumka kukaKrish. Emva kokulahla kwam emanqindini ndaya kwaSARS, apho ndaxelelwa ukuba ndinetyala. Ndandingazi kwanto ngalonto. Into endiyaziyo kukuba babetsala irhafu kwimali endandiyilwela.”
UBaloyi wongeze ngelithi: “Inyuka ngokunyuka ngalo lonke ixesha imali endiyityalayo. Ngoku ndityala imali ephantse ibesisigidi seerandi. Ndandityala amakhulu amane amawaka ukuyeka kwam amanqindi, ngoku ityala lingaphaya kwamakhulu asixhenxe amawaka. Andiyazi ukuba mandithini na, ndidinga uncedo. Andiyazi ukuba ndingancedwa ngubani na okanye ndingalufumana njani, phi na uncedo? Ndiyoyika kuba kungenzeka ndihlangabezane neengxaki ezininzi.”
Emva kokuqala ukulwa kudidi lwabahlawulwayo ngoMatshi 1994 kwayokuthi ga ngo-Okthobha 2012, uBaloyi waphumelela imilo engamashumi amathathu anesixhenxe, enqumamise amadoda alishumi elinethoba, wabethwa kwimilo esibhozo, waze walwa ngokulingana komnye.
UKrish Naidoo, owasebenza njengebambela-ngqonyela nomlawuli jikelele kwaBSA phakathi kuka-2004 no-2007, uphefumle wathi: “Lamthetho wawenzelwe iimbethi-manqindi zangaphandle ezizinze apha eMzantsi Afrika. Asizange nangemini enye sitsale imali kwiimbethi-manqindi zaseMzantsi Afrika kuba sasifuna ukuhlawula irhafu.”
Ethetha emva kokukrwecwa, uLoyiso Mtya, owayelibambela ngqonyela kwaBoxing South Africa (BSA), uthethe wathi: “Andazi nto ngomthetho kaKrish. Into endingayithethayo kukuba kwakukho ingxaki enkulu ngerhafu yeembethi-manqindi ukufika kwam. Saya kwaSARS, sabanentlanganiso khona, apho kwagqitywa kwelokokuba imbethi-manqindi nganye mayijongane nemicimbi yayo yerhafu. – Monwabisi Jimlongo
