IBanyana Banyana iphumelele umdlalo wesibini ngokubetha iMalawi ngamanqaku amabini kwelinye kumdlalo wobuhlobo eLucas Moripe Stadium, e-Atteridgeville, kwintshona yePitoli emva kwemini ngoLwesibini.
IBanyana ize ngemva emva kokuba uVanessa Chikupira efake inqaku leMalawi kwimizuzu elishumi elinesithathu siqalile isiqingatha sesibini.
Inqaku lokulinganisa leBanyana lifakwe nguHildah Magaia ngomzuzu wamashumi asixhenxe anesihlanu, waze u-Amogelang Motau wafaka elokuphumelela kwimizuzu emithathu ngaphambi kokuphela komdlalo.
IBanyana isebenzise imidlalo yayo emibini yokugqibela njengamalungiselelo etumente yeWomen’s Africa Cup of Nations ezakuqala ngoJulayi.
