Izakuba ngumlo wama-Afrika odwa xa uNtethelelo ‘Baby G’ Nkosi eqala uhambo lwakhe kwiWBC Grand Prix eRiyadh kwelaseSaudi Arabia njengokuba esilwa noMarwan Mohamad Madboly waseYiphutha.
UNkosi, oneminyaka engamashumi amabini anesibhozo nophumelele imilo esixhenxe, waze wabethwa kwemibini, wayithi xibilili intshinga yakhe yoMzantsi Afrika kudidi lwejunior-welterweight emva kokukhetha ukulwa kwiWBC Grand Prix enentywenka yemali.
Njengokuba iWBC Grand Prix iqala ngoLwesine kude kuyokuthi ga ngeCawa, lenzalelwane yaseMtubatuba izakulwa noMadboly ngoLwesihlanu.
Ngokokutsho kukaDamien Durandt, ongumqeqeshi kaNkosi, umlo nomYiphutha, oneminyaka engamashumi amabini anesine, uzakuqala ngentsimbi yesibini emva kwemini ngokwexesha laseMzantsi Afrika.
UMadboly unento engaphaya kweminyaka emibini kususela mhla waqala ukulwa kudidi lwabahlawulwayo njengokuba umlo wakhe wokuqala wawungoMatshi 2023. Uyiphumelele yomihlanu imilo yakhe, enqumamise amadoda amathathu.
