Ekhusela intshinga yakhe yeWorld Boxing Council (WBC) kudidi lwebridgerweight okokuqala, uKevin Lerena unqumamise uSerhiy Radchenko wase-Ukraine eSunBet Arena, eTime Square, ePitoli, ngokuhlwa kwangoLwesine.
Ibisisipho esikhawulezileyo somhla wokuzalwa kukaLerena njengokuba ezakufinca iminyaka engamashumi amathathu anesithathu ngoMvulo kuleveki ezayo. ULerena uthabathe imizuzwana elishumi elinesithandathu ukunqumamisa uRadchenko onqandelwe yikona yakhe.
Ngaphambi kokunqumamisa lommi wase-Ukraine, uLerena, owayeyintshatsheli ye-International Boxing Organisation (IBO) kudidi lwecruiserweight, ukhe wamvusa phantsi uRadchenko kwade kwabakabini kumjikelo wesibini.
Kusenjalo, inqindi lasekhohlo ebelinobuhlungu nebelisuka kwinjinga ye-IBO kudidi lwewelterweight uThulani Mbenge linqumamise u-Emmanuel Mungandjela waseNamibia kumjikelo wesithathu kumlo ubungengowentshinga.
Ezinye ziphumo:
UTiisetso Matikinca unqumamise uMbulelo Gubula kumjikelo wesibini
UGary van Staden ubethe uSeth van Aswegen ngamanqaku
ULeo Carreri unqumamise uNiclas Nzengu kumjikelo wokuqala
UChris Thompson unqumamise uMussa Ajibu kumjikelo wesithathu
UThabiso Mchunu ubethe u-Amador Kalonji
