Ifikelele esiphelweni imbalela yeminyaka elishumi emva kokuba iKaizer Chiefs iphumelele iNedbank Cup ngokubetha i-Orlando Pirates ngamanqaku amabini kwelinye eMoses Mabhida Stadium, eThekwini, ngokuhlwa kwangoMgqibelo.
Amakhosi aphale phambili ngenqaku lommi wase-Uruguay uGaston Sirino ngomzuzu weshumi. Usompempe womdlalo uMasixole Bambiso wolathe echaphazeni emva kokuba umdlali wasemva wePirates uDeano van Rooyen edlale kakubi uPule Mmodi ngaphakathi ebhokisini.
Kuthabathe imizuzu esixhenxe nje ngaphambi kokuba iPirates ifake inqaku lokulinganisa ngentloko ka-Evidence Makgopa kwibhola ebifakwe kuye nguDeon Hotto.
Ukapteni weChiefs uYusuf Maart ulibethe lahlokoma ibala emva kokufaka inqaku lesibini leqela lakhe kumzuzu wamashumi asibhozo emva kwebhola ebisuka ku-Ashley du Preez.