Uzakubekwa kwikhaya lokulinda eKapa kuloMgqibelo ozayo ongasekho nowayesakuba ngumqeqeshi wamanqindi nembethi-manqindi ehlawulwayo u-Emil Brice obhubhe ngentseni yangoLwesine emva kwedabi nomhlaza.
Inkonzo yomngcwabo izakubanjelwa e-Our Lady Help of Christians Catholic Church eLansdowne ngecala lentsimbi yethoba kusasa.
UBrice waqala ukulwa kudidi lwabahlawulwayo ngoMatshi 1978, ebetha u-Org Slabbert. Wabethwa nguBobby Chisale kumlo wakhe wokugqibela ngo-Epreli 1983.
Wayengumqeqeshi kaLunga Sitemela ngethuba enqumamisa uSibusiso Zingange kumjikelo weshumi ephumelela intshinga yoMzantsi Afrika kudidi lwejunior-lightweight ngoMeyi 2022.
U-Emil wayesekoneni kaSitemela kwakhona ngethuba ephumelela intshinga yeWorld Boxing Federation (WBF) kudidi lwejunior-lightweight emva kokunqumamisa ummi waseBostwana uSteve Bagwasi kumjikelo wesithathu eGaborone ngoJuni 2023.
