Amalungiselelo kaBekizizwe Maitse omlo wakhe olandelayo afumene ukuncediswa njengokuba intshatsheli yamhlamnene ehlabathini uZolani ‘Last Born’ Tete encedisa ekumloleni.
UMaitse uzakulwa nommi waseTanzania uJuma Choki ogama lipheleleyo linguJuma Ramadhani Juma Kikande kumjikelo olandelayo weWBC Grand Prix eRiyadh kwelaseSaudi Arabia kulenyanga ezayo.
Lonyana kaBongani Mahlangu, owayeyinjinga yoMzantsi Afrika kudidi lwejunior-featherweight, ufikelele kumjikelo wesibini emva kokubetha uRodolfo Puentes waseColombia ngamanqaku, waze uChoki wabetha uBryx Piala wasePhilippines kulenyanga ephelileyo.
“Uzakulwa nommi waseTanzania ongekabethwa. UZolani negqiza lakhe bancedisa uBekiziwe ekuziqeqesheni phaya kwindawo yokuziqeqesha yeWBC,” utshilo uBrad Norman, ongumlawuli kaMaitse.
UChoki uphumelele imilo elishumi, enqumamise amadoda amathathu, elwe ngokulingana komnye. Yena uMaitse uphumelele kwimilo esixhenxe, enqumamise amadoda amathathu, wabethwa kumlo omnye.
Ukanti, uTete ufike eRhawutini ehamba noTheo Nxayiphi ngoMvulo kuleveki ephelileyo, yena Mthokozisi Ngxaka, oyintshatsheli yoMzantsi Afrika kudidi lweminimumweight, ugaleleke ngoMgqibelo.
UNxayiphi ulungiselela umlo we-IBF Africa kudidi lwempukane njengokuba ezakulwa noSamkelo Frank Sotomela eCarnival City, eBrakpan, ngoMgqibelo, logama uNgxaka ezakukhusela intshinga yakhe kulenyanga ezayo. – Monwabisi Jimlongo
