Ingxaki yenani eliphantsi okanye yokungabikho kweembethi-manqindi ezininzi kwicandelo labasetyhini ikhokelele ekubeni intshatsheli yoMzantsi Afrika kudidi lwemini-flyweight uThobela Nyanda noYonelisa Poni balwe isihlandlo sesithathu njengokuba bezakuvana amandla eMonti ngomhla wamashumi amabini kuJuni.
UNyanda ubethe uPoni kuyo yomibini imilo yabo, kwaye wambetha nangethuba besilwela intshinga yoMzantsi Afrika kudidi lwemini-flyweight eWells Estate, eGqeberha, ngo-Okthobha 2023.
UNyanda, owayetyunjelwe kuluhlu lweFemale Prospect of the Year kumsitho we-2023 South African Boxing Awards, akakalwi ukususela mhla wabetha uPoni eGqeberha. Kwaye, uNyanda uyiphumelele yomine imilo yakhe, enqumamise amaxhoba akhe amathathu.
Kwelinye icala, uPoni, ophumelele imilo emibini, enqumamise amaxhoba ababini, wabethwa kathathu, ubethe uNamhla Mankayi kumlo wakhe wokugqibela ngo-Okthobha kulonyaka ophelileyo.
