Eteketiswa ngegama elithi ‘Simply The Best’, uSechaba Zuma uthethe ngesibindi esithi uzakuphela msinyane umlo wakhe nentshatsheli yoMzantsi Afrika kudidi lwejunior-bantamweight uLwando Mgabi.
UZuma, ocela umngeni kuMgabi kwiholo yedolophu yase-Estcourt ngoMgqibelo kuleveki ezayo, uthi umlo wakhe, onemijikelo elishumi elinambini, uzakuphela ingafikanga loomijikelo.
“Into endinokuyithembisa kukuba soze afike kumjikelo wesihlanu. Yintshinga yalapha eKZN le, nokokuba kuthiwani na,” utshilo uZuma.
Eqeqeshwa nguSizwe Mthembu eThekwini, uZuma unqumamise indoda enye qha kwimilo emine ayiphumeleleyo, ebethwe kwemibini, waze walwa ngokulingana komnye, logama uMgabi eyiphumelele yosixhenxe imilo yakhe, enqumamise amadoda amabini.
Kusenjalo, uMgabi, oyinzalelwane yaseDuncan Village, eMonti, nowafudukela eKhayelitsha, eKapa, kwiminyaka embalwa eyagqithayo, uzakube ekhusela intshinga yakhe okokuqala ukususela mhla wayiphumelela ngokubetha uSihle Jelwana wakuKomani eKapa ngoSeptemba nyakenye.
