Enethemba lokugqithela kumjikelo olandelayo weWBC Grand Prix, uNtethelelo ‘Baby G’ Nkosi negqiza lakhe bazakuntingela eRiyadh kwelaseSaudi Arabia ngoLwesibini kuleveki ezayo kwilinge lokuzingela nokuzuza udumo.
UNkosi, owayeyinjinga yoMzantsi Afrika kudidi lwejunior-welterweight, uzakulwa nommi waseChina uJu Wu kumjikelo wesibini weWBC Grand Prix eGlobal Theatre Boulevard Riyadh City, Riyadh, kuleveki ezayo ngoLwesihlanu.
Lenzalelwane yaseMtubatuba, KwaZulu-Natal, yangena kumjikelo olandelayo wolukhuphiswano emva kokunqumamisa uMarwan Mohamad Madboly waseYiphutha kumjikelo wesithathu ngo-Epreli.
“Sizakundulukela eSaudi Arabia ngomhla weshumi elinesixhenxe kuJuni,” udize watsho uNkosi, ophumelele imilo esibhozo, enqumamise amadoda amahlanu, wabethwa kwimilo emibini.
Ngelilixa uNkosi wanqumamisa uMadboly, uWu, oneminyaka engamashumi amabini anesihlanu noyintshatsheli yeWBC Far East kudidi lwejunior-welterweight, ufikelele kumjikelo wesibini wolukhuphiswano emva kokubetha uJokin Garcia waseSpain ngamanqaku ngo-Epreli.
Elinxele, elazalelwa eJinan kwelaseChina, lakhe labayintshatsheli yeWorld Boxing Organisation (WBO) Asia-Pacific Youth ne-IBO International kudidi lwelightweight. – Monwabisi Jimlongo
