IMamelodi Sundowns ibuyela ekhaya emva kokukhutshwa kwiFIFA Club World Cup ngethuba ibambana ngeqanda macala omabini neFluminense yaseBrazil kumdlalo kaGroup F eHard Rock Stadium eMiami, eFlorida, kwelaseMelika ngokuhlwa kwangoLwesithathu, ngokwexesha loMzantsi Afrika.
Nangona nje idlale kakuhle, yadala amathuba okufaka amanqaku aliqela, iSundowns iphoxwe kukubhatyaza phambili, ingakumbi uTashreeq Matthews, ongakwazanga ukufaka ibhola emnatheni ejongene nonozinti.
Ekugqibeleni, izangxa zaseTshwane zibuyela ekhaya emva kokuphumelela umdlalo omnye, zabambana komnye, zabethwa komnye kuletumente.
