Ukolulwa komhla wokuvala kwifandesi yomlo wentshinga yoMzantsi Afrika engenamntu kudidi lwejunior-welterweight phakathi ko-Aphiwe Boyiya noSibusiso Zingange kube lilize.
I-Ink Sport ifumanise ukuba akukho namnye umthelekisi obonakalise umdla kulomlo ngexesha lokuvalwa kwezicelo emini maqanda ngoLwesine kulandela emva kokurhoxa kulefandesi komlawuli weKay B Promotions uMzi Booi.
Ekuqaleni, ibinguBooi kuphela ofake isicelo kulefandesi ngaphambi kokuba ibhodi kaBoxing South Africa (BSA) ithabathe isigqibo sokolula umhla wokuvala emva kwentlanganiso neNational Professional Boxing Promoters Association (NPBPA).
Ngoku, baphoxeke bamanzi abaphathi bakwaBSA, nto ke leyo ebanyanzelise ukuba bathethe noBooi, bembuza izizathu zokurhoxa kwakhe.
“Batsalele uMzi umnxeba kuleveki ephelileyo bembuza ukuba urhoxele ntoni na. Kuyacaca ukuba ayibaphathanga kakuhle into yokurhoxa kukaMzi,” utshilo umthombo we-InkSport ngoMvulo.
I-Ink Sport ive into yokokuba uBooi uxhasa usomaqhuzu weTLB Boxing Promotions uJoyce Kungwane, olindele ukuba uBSA asivume isicelo sakhe sokwenza umlo phakathi koBoyiya noZingange nozakubanjelwa e-Emperor’s Palace, e-Kempton Park, Ekurhuleni, ngoMgqibelo umhla wamashumi amabini anesithandathu kuJulayi.
