Njengokuba kushiyeke into engaphantsi kweeveki ezintathu ngaphambi komlo wakhe, uPhumelela ‘The Truth’ Cafu nomqeqeshi wakhe uColin ‘Nomakanjani’ Nathan bazakuntingela eLas Vegas kwelaseMelika ngoMgqibelo.
UCafu uzakuqhubela phambili namalungiselelo omlo wakhe nommi waseMelika uJesse ‘Bam’ Rodriguez, mlo lowo ozakubanjelwa eFord Centre, eStar Frisco eDallas, eTexas, eMelika, ngoMgqibelo umhla weshumi elinethoba kuJulayi (ngeCawa umhla wamashumi amabini kuJulayi, ngokwexesha loMzantsi Afrika).
Ezimbethi-manqindi ezimbini zizakulwela iintshinga zeWorld Boxing Organisation (WBO), World Boxing Council (WBC) neye Ring Magazine kudidi lwejunior-bantamweight. UCafu yintshatsheli yeWBO, logama uRodriguez ephethe intshinga yeWBC.
“Mna noCafu sintingela eLas Vegas ebusuku ngomso,” utshilo uNathan emva kwemini ngoLwesihlanu.
UCafu, oyinzalelwane yaseDuncan Village, eMonti, waphumelela intshinga ye-WBO ngethuba esothussa uKosei Tanaka easeJapan kwelaseJapan ngo-Okthobha nyakenye.
