Iimbethi-manqindi ezimbini zaseMpuma Koloni, intshatsheli nomcelimngeni, zizakuvana amandla kumlo wentshinga yoMzantsi Afrika ngaphandle kwemida yephondo lazo ebutsheni benyanga ezayo.
Inzalelwane yaseMthatha nekwayinjinga yoMzantsi Afrika kudidi lweminimumweight uMthokozisi Ngxaka uzakhusela intshinga yakhe xa esilwa noThinumzi Gqola kwiholo iPortuguese eRhawutini ngeCawa umhla wesithathu ku-Agasti.
UNgxaka uzakube eyikhusela okokuqala intshinga yakhe kususela mhla wayiphumelela ngokunqumamisa uThami Luthuli kumjikelo wesine e-Orient Theatre, eMonti, kwisithuba esingaphaya kweenyanga ezintathu.
Kwelinye icala, uGqola wazuza ithuba lokucela umngeni kulentshinga yoMzantsi Afrika emva kokunqumamisa umkhaya wakhe waseDuncan Village, eMonti, uMalakhi Sobolo kumjikelo wokuqala ngoMatshi.
Kusenjalo, uCarl van Blerk uzakuqubisana noSiphamandla Manqatha kumlo wentshinga yaseGauteng nengenamntu kudidi lwejunior-lightweight.
