Njengokuba usondela umlo wakhe olandelayo, uKevin Lerena negqiza lakhe bazakunikela uMzantsi Afrika umva, bentingela kwelase-United Kingdom ngoMgqibelo, kwilinge lokuqhubela phambili namalungiselelo omlo wakhe noLawrence Okolie.
ULerena uzakucela umngeni ku-Okolie, oyintshatsheli yeWorld Boxing Council (WBC) Silver kudidi lwanzima, eWembley Arena, eLondon ngoMgqibelo kuleveki ezayo.
“Sintingela kwelase-United Kingdom ngoMgqibelo,” uqinisekise watsho uLerena, oyinjinga yeWBC kudidi lwebridgerweight.
ULerena no-Okolie kwakufanele ukuba balwa kumlo wentshinga yeWBC kudidi lwebridgerweight kulonyaka ophelileyo. Kodwa lo mlo lowo awuzange ubekhona njengokuba u-Okolie wonyukela ngentla kudidi lwanzima.
ULerena, oneminyaka engamashumi amathathu anesithathu, uya kumlo no-Okolie emva kokuyikhusela ngempumelelo okokuqala intshinga yakhe yeWBC kudidi lwebridgerweight ngokubetha ummi wase-Ukraine uSerhiy Radchenko ePitoli kwisithuba esingaphaya kweenyanga ezimbini.
Kwelinye icala, u-Okolie, oneminyaka engamashumi amathathu anesibini nowazelwa eHackney, eLondon, uzakube esilwa okokuqala ukususela mhla wabetha uHussein Muhamed waseJamani eWembley Arena ngoDisemba nyakenye.
Kusenjalo, umlo kaLerena no-Okolie uzakugabulela izigcawu u-Oleksandr Usyk wase-Ukraine kunye noDaniel Dubois waseNgilane.
Esisibini sizakulwela iintshinga zeWorld Boxing Council (WBC), International Boxing Federation (IBF), World Boxing Organisation (WBO) kunye ne-International Boxing Organisation (IBO) kudidi lwanzima.
