Uluntu lwamanqindi lwaseMzantsi Afrika luzilile kulandela ukubhubha kwembethi-manqindi yasetyhini yaseMpuma Koloni uThapelo Bokwe ngoMvulo.
UBokwe uswelekele kwisibhedlele saKwaNojoli emva kokungeniswa kuso ngoMgqibelo weveki ephelileyo. UBokwe wabalekiselwa esibhedlele emva kokukhala ngentloko eyayiqaqamba ngokungenambaliso.
Kuleveki ephelileyo, umqeqeshi wakhe uSiyabulela ‘Baba’ Makala wavakalisa ukungoneliseki kwakhe ngendlela uBokwe awasuswa ngayo kuluhlu lweembethi-manqindi. UMakala ubenoluvo lokokuba ikomiti ecwangcisa uluhlu lweembethi-manqindi yayimdlele indlala uBokwe, owagqibela ukulwa ngethuba wayebethwa nguNomfundo Xaba ngo-Epreli kulonyaka.
UBokwe, obephumelele imilo emibini, wabethwa kwemibini, wabethwa ngu-Okuhle Mthi eGqeberha ngo-Okthobha 2023, waze waphinda wabethwa nguXaba eScenery Park Hall, eMonti.
