Emva kokuphulukana nentshinga yakhe yoMzantsi Afrika kudidi lwejunior-bantamweight ngenxa yokungabenzi ubunzima obabulindelekile, waze wahliselwa ngezantsi kuluhlu lweembethi-manqindi nangona engekabethwa okanye alwe ngokulingana, uLwando Mgabi uzakubuyela eqongeni kulenyanga ezayo.
Lo owayesakuba yintshatsheli yoMzantsi Afrika noyinzalelwane yaseDuncan Village uzakulwa no-Ayanda Gangqa waseGqeberha kwiholo iPortuguese, eTurffontein, eRhawutini, ngeCawa umhla weshumi elinesixhenxe ku-Agasti.
“Sizakulwela eRhawutini no-Ayanda Gangqa waseGqeberha kulenyanga ezayo,” uqinisekise watsho uSiyabonga Mafika, ongomnye wabaqeqeshi bakaMgabi.
Izakuba sisihlandlo sesibini uMgabi, ozinze eKhayelitsha, eKapa, esilwa noGangqa. UMgabi wanqumamisa uGangqa kumjikelo wesihlanu kumlo wabo owawuseMossel Bay Arena, eMossel Bay, ngoJulayi 2023.
Kusenjalo, uMgabi waphulukana nentshinga yakhe emva kokufeda ukwenza ubunzima obulindelekileyo ngaphambi kokunqumamisa uSechaba Zuma kumjikelo wesihlanu e-Estcourt, KwaZulu-Natal, kulenyanga ephelileyo.
Nangona wawuphumelelayo lo mlo, uMgabi, oyiphumelele yosibhozo imilo yakhe, enqumamise amadoda amathathu, wahliselwa, wayokubekwa kwindawo yesithathu kuluhlu lweembethi-manqindi.
Ukanti, ephumelele imilo emine, enqumamise amadoda amabini, wabethwa kwemine, walwa ngokulingana komnye, uGangqa ugqibele ukulwa ngethuba enqumamisa u-Asiphile Xhipholwana waseDuncan Village kumjikelo wesithathu eKariega kwiinyanga ezintlanu ezigqithileyo. – Monwabisi Jimlongo
