Imizuzu elishumi elinesixhenxe yokugqibela kumdlalo weMagesi FC neMamelodi Sundowns izele amaduna namathokazi kwiiintshatsheli ezikhuselayo zeBetway Premiership njengokuba zibethe eliqela laseLimpopo ngamanqaku amabini eqandeni eSeshego Stadium, ePolokwane, ngokuhlwa kwangoLwesithathu.
Emva kokuqengqa amaqanda ekupheleni kwesiqingatha sokuqala, ngelingeni iiBrazilians ziphale phambili ngenqaku likaJayden Adams ngomzuzu wamashumi asixhenxe anesithathu.
Umdlali weqela lesizwe laseNamibia uPeter Shalulile ufake inqaku lesibini ngomzuzu wamashumi asibhozo anesixhenxe kwibhola ebeyinikwa nguTashreeq Matthews, waze ngaloondlela wanika izangxa zaseTshwane impumelelo yazo yesibini kwimidlalo emithathu.
Ngoku uShalulile sele efake amanqaku alikhulu namashumi amabini anethoba, manqaku lawo alingana nawafakwa nguSiyabonga Nomvethe, owayedlalela iMoroka Swallows, i-Orlando Pirates neKaizer Chiefs.
Kwelinye icala, iPirates iphumelele okokuqala njengokuba ibethe iStellenbosch FC ngenqaku elinye eqandeni e-Orlando Stadium, eSoweto, logama AmaZulu ebethe iMarumo Gallants ngenqaku elinye eqandeni ePrincess Magogo Stadium, KwaMashu, eThekwini.
