UBeaven Sibanda uzakuphinda alwe nenye imbethi-manqindi yasePhilippines njengokuba ebila, esoma elungiselela umlo wakhe noJoey Canoy e-Emperors Palace eKempton Park, Ekurhuleni, ngoMgqibelo umhla wesine ku-Okthobha.
USibanda waseHarare kwelaseZimbabwe uzakukhusela intshinga yakhe ye-IBF International kudidi lwemini-flyweight xa esilwa noCanoy, oneminyaka engamashumi amathathu anesibini.
Ekuqaleni, uCanoy ebezakulwa noSiyakholwa Kuse kumlo weWorld Boxing Council (WBC) Silver kudidi lweminimumweight ngalomhla omnye nomlo noSibanda, kodwa ziguqukile izinto ngoku.
“Ewe, uBeaven uzakulwa noJoey Canoy,” uqinisekise watsho uBrian Mitchell, ongumphathi kaSibanda.
USibanda, oneminyaka engamashumi amabini anesithathu, uzakube eyikhusela okokuqala intshinga yakhe ye-IBF International, awayiphumelela ngethuba enqumamisa uRichard Garde wasePhilippines kumjikelo wesihlanu kulenyanga ephelileyo. UCanoy, kwelinye icala, ubethe ummi waseVietnam uMihn Phat Sam kwiinyanga ezine ezigqithileyo.
USibanda ubekwa kwindawo yesihlanu kwiWBC, kweyethoba kwi-IBF nakweyeshumi elinesine kwiWorld Boxing Organisation (WBO), logama uCanoy ekwindawo yesithathu kwiWBC, kweyeshumi elinesine kwiWorld Boxing Association (WBA), kweyeshumi kwi-IBF nakweyesihlanu kwiWBO.
Ephumelele imilo elithoba, enqumamise amadoda amathathu, wabethwa kumlo omnye, uSibanda uzakulwa noCanoy, ophumelele imilo engamashumi amabini anesine, wanqumamisa amadoda alishumi elinesihlanu, wabethwa kahlanu, walwa ngokulingana kwimilo emibini. – Monwabisi Jimlongo
