Umlo obuphakathi kukaMlandeli Tengimfene nekomiti elungelelanisa uluhlu lweembethi-manqindi kwaBoxing South Africa (BSA) uphele lomphathi weembethi-manqindi, ozinze eMonti, ephakanyiselwe phezulu emva koloyiso.
UTengimfene uye wangqubana ngeentloko nalekomiti, waze woyisa emva kokuba imbethi-manqindi yakhe uLwando Mgabi edlelwe indlala ngokuhliselwa asuswe kwindawo yesithathu, ayobekwa kweyesine kuluhlu lweembethi-manqindi nangona ewuphumelele umlo wakhe kulenyanga ephelileyo.
“Andisayikuze ndisonge izandla zam logama iimbethi-manqindi zam zixhatshazwa ngabantu abaxhaphaza amagunya abo. Ndizakuzilwela rhoqo iimbethi-manqindi zam xa ndibona ukuba akwenziwanga bulungisa kuzo,” utshilo uTengimfene, ochwayitileyo.
Akuphelelanga kuloyiso lukaTengimfene nje, kuye kwaqinisekiswa ukuba uMgabi uzakulwela intshinga yoMzantsi Afrika kudidi lwejunior-bantamweight njengokuba ekwindawo yesithathu ngoku, logama uSechaba Zuma, awamnqumamisa kumjikelo wesihlanu kwiinyanga ezintathu ezigqithileyo, esuke kwindawo yokuqala wayokutsho kweyesine.
Ngokokutsho kukaBSA, yimpazamo yomntu ebibeke uMgabi, owaphulukana nentshinga yakhe emva kokoyisakala ukwenza ubunzima obabulindelekile ngaphambi komlo wakho noZuma kwiholo yedolophu e-Estcourt, KwaZulu-Natal, kwindawo yesine, kwaye ngoku uzakulwa nophumeleleyo phakathi koNtethelelo Magcaba noMoyisi Booi, abazakulwela intshinga engenamntu kudidi lwejunior-bantamweight.
UMagcaba, obekwa kwindawo yokuqala kudidi lwejunior-bantamweight, uzakulwa noBooi, okwindawo yesibini, kumlo ozakubanjelwa e-Orient Theatre, eMonti, ngeCawa umhla wamashumi amabini anesibhozo kuSeptemba. – Monwabisi Jimlongo
