UBeaven Sibanda unethemba emva koqhaqho olubeyimpumelelo ngoLwesibini kulandela umonzakalo owanyanzelisa ukuba arhoxe kumlo wakhe noJoey Canoy wasePhilippines.
USibanda wonzakala emsipheni ngethuba elungiselela umlo wokukhusela intshinga ye-IBF International kudidi lweminimumweight kuCanoy, mlo lowo owawuzakubanjelwa e-Emperors Palace, eKempton Park, Ekurhuleni, ngoMgqibelo umhla wesine ku-Okthobha.
“Ndiye ndenziwa uqhaqho ngoLwesibini. Ngoku ndinesamente ezakukhutshwa emva kweeveki ezimbini. Neentlungu zidambile ngoku,” utshilo uSibanda.
USibanda, oyinzalelwane yaseHarare kwelaseZimbabwe, waphumelela intshinga ye-IBF International kudidi lweminimumweight emva kokunqumamisa uRichard Garde wasePhilippines kumjikelo wesihlanu ngoJulayi.
Lomfana, oneminyaka engamashumi amabini anesithathu, ubekwa kwindawo yesithandathu kwiWorld Boxing Council (WBC), kweyethoba kwi-IBF nakwindawo yeshumi elinesine kwiWorld Boxing Organisation (WBO). USibanda uphumelele imilo elithoba, wanqumamisa amadoda amane, waze wabethwa kumlo omnye. – Monwabisi Jimlongo
