Emva kokushiya iXaba Boxing Academy nyakenye, owayeyintshatsheli yoMzantsi Afrika kudidi lwejunior-bantamweight, uMiniyakhe ‘Showtime’ Sityata, ubuyele kwesasibaya, eyokuqeqesha iimbethi-manqindi.
USityata, ongumninawa yowayeyinjinga ye-International Boxing Organisation (IBO) kudidi lwejunior-bantamweight, uLwandile Sityata, usezakuqhubela phambili esebenza noMnyamezeli ‘Fire’ Shosha ekuqeqesheni iimbethi-manqindi zaseXaba.
Lenzalelwane yaseMdantsane ingena, iphuma eXaba Boxing Academy. USityata washiya iXaba ngo-2021, waphinda wabuyela emva konyaka njengokuba ebephinde wemka kulonyaka ophelileyo.
“Ndibuyele ngoMvulo kuleveki ephelileyo. Ndisasebenza noTa Fire,” uSityata uqinisekise watsho ngoLwesine.
Kulindeleke ukuba uSityata abesekoneni yentshatsheli yoMzantsi Afrika kudidi lwejunior-featherweight, uSiyabulela Hem, xa ekhusela intshinga yakhe kuVusi Ngcamu naxa uMoyisi Booi esilwa noNtethelelo Magcaba kumlo wentshinga engenamntu eMzantsi Afrika kudidi lwejunior-bantamweight e-Orient Theatre, eMonti, ngeCawa. – Monwabisi Jimlongo
