UXolisani ‘Nomeva’ Ndongeni uzakulwa noJhon Elin Orobio Siniestra waseColombia eMontreal kwelaseCanada kulenyanga ezayo.
Lomlo wentshinga yeWorld Boxing Council (WBC) Continental Americas kudidi lwejunior-welterweight phakathi koNdongeni no-Orobio uzakubanjelwa eMontreal Casino, eMontreal, ngoLwesine umhla weshumi elinesithathu kuNovemba (ngoLwesihlanu umhla weshumi elinesine kuNovemba, ngokwexesha loMzantsi Afrika).
“Ndizakulwa eMontreal kwelaseCanada ngomhla weshumi elinesithathu kuNovemba. Kufuneka ndiwulungele lomlo, kwaye ndimaxhaphetshu ndiwulungiselela ngendlela endingazange ndaziqeqesha ngayo ngaphambili,” UNdongeni, oneminyaka engamashumi amathathu anesihlanu, ubhale watsho kwiqonga lezoluntu uFacebook.
UNdongeni, oyinzalelwane yaKwaBhaca, eMpuma Koloni, ugqibele ukulwa ngethuba ebethwa ngummi wase-Armenia uHovhannes Bachkov ngoJulayi. Kwelinye icala, u-Orobio ubethe u-Ivan Basurto Monroy ngexesha ebeyikhusela okokuqala intshinga yakhe yeWBC Continental Americas kudidi lwejunior-welterweight kulenyanga ephelileyo.
Lentshatsheli yamhlamnene kwi-International Boxing Organisation (IBO) naseMzantsi Afrika kudidi lwelightweight, iphumelele imilo engamashumi amathathu anesithathu, inqumamise amadoda alishumi elinethoba, yabethwa kwimilo esixhenxe.
Kusenjalo, u-Orobio, oneminyaka engamashumi amabini anesibini, akakabethwa njengokuba eyiphumelele yolishumi elinesihlanu imilo yakhe, enqumamise amadoda alishumi elinesithathu. – Monwabisi Jimlongo
