Ebekwa kwindawo yeshumi kwi-International Boxing Federation (IBF) emva kokwehla esuka kwindawo yesihlanu xa kuthelekiswa nenyanga ephelileyo, uSivenathi ‘Special One’ Nontshinga uzakubuyela eqongeni kulenyanga ezayo.
Ukubuyela kukaNontshinga eqongeni kudizwe yingqonyela yeBoxing 5 Promotions uLarry Wainstein kusasa ngoLwesibini. UNontshinga uzakulwa nentshatsheli yodidi lwempukane eNamibia uJonas Erastus eBox Camp Booysens, eRhawutini, ngoMgqibelo umhla weshumi elinesihlanu kuNovemba.
Lomfana wakwaNontshinga, oneminyaka engamashumi amabini anesithandathu, akakalwi ukususela mhla waphulukana nentshinga yakhe ye-IBF kudidi lwejunior-flyweight emva kokubethwa ngummi waseJapan uYabuki Masamichi ngokumnqumamisa kumjikelo wethoba kulonyaka ophelileyo.
UNontshinga waseMonti eMpuma Koloni, owaphumelela intshinga ye-IBF kudidi lwejunior-flyweight izihlandlo ezimbini, kudala ebila esoma eHot Box Gym elungiselela lomlo no-Erastus.
Kusenjalo, u-Erastus, ophumelele imilo elithoba, wanqumamisa amadoda amabini, ubethwe ngummi waseBrithane u-Alfie Clegg eYork Hall Bethnal Green kwelase-United Kingdom kwiinyanga ezine ezigqithileyo.
