Njengokuba waphumelela imilo emininzi kude nekhaya ngexesha wayeseyimbethi-manqindi kudidi lwabahlawulwayo, uBrian Mitchell uqinisekile ukuba imbethi-manqindi yoMzantsi Afrika neyinzalelwane yaseMdantsane, eMpuma Koloni, uSiyakholwa Kuse uzakuwafezekisa amaphupha akhe okuba yinjinga yehlabathi.
UKuse uzakucela umngeni kwintshatsheli yeWorld Boxing Council (WBC) kudidi lwestrawweight nommi wasePhilippines uMelvin Jerusalem eSmart Araneta Coliseum, eQuezon City, eManila, kwelasePhilippines ngoLwesithathu kuleveki ezayo.
Lentshatsheli yamhlamnene eMzantsi Afrika kudidi lweminimumweight igaleleke ePhilippines ngoLwesithathu, ihamba noMitchell, ongumlawuli wayo, ikhankatha layo uManny Fernandes nosekela-mqeqeshi uRichard Fernandes.
UKuse uzakube eleqa ukwenza imbali njengokuba efuna ukuba yimbethi-manqindi yokuqala eMpuma Koloni ukuba yintshatsheli yehlabathi ngaphantsi kweWBC.
“URichard kunye noyise uManny Fernandes nam Brian Mitchell sizakumthabatha uSiya Kuse waseMonti ukuba abengummi wokuqala waseMonti ukuphumelela intshinga yehlabathi kudidi lwestrawweight kwiWBC ngoLwesithathu kuleveki ezayo,” uphefumle watsho uMitchell, owayeyinjinga yeWorld Boxing Association ne-International Boxing Federation (IBF) kudidi lwejunior-lightweight.
Umlo kaKuse noJerusalem uyinxalenye yeThrilla in Manila, ekhumbula iminyaka engamashumi amahlanu ukususela mhla abangasekhoyo uMuhammad Ali noJoe Fraizier balelwa ePhilippines. – Monwabisi Jimlongo
