Nangona nje ezakulwa ngaphambi kwabantu belizwe lakhe, ummi wasePhilippines uMelvin ‘El Gringo’ Jerusalem akafuni konke-konke ukumjongela phantsi uSiyakholwa Kuse waseMzantsi Afrika njengokuba bezakulwa eSmart Araneta Coliseum, eQuezon City, eManila, kwelasePhilippines, ngoLwesithathu.
Nanjengokuba umlo wendibaniswano lweebhanti nenxele lasePuerto Rico elingekabethwa u-Oscar ‘El Pupilo’ Collazo, oyintshatsheli emanye iintshinga zeWorld Boxing Association (WBA) neWorld Boxing Organisation (WBO) kudidi lwestrawweight, ubonakala unikisa umdla, uJerusalem ulibeke latsola elokokuba yena ugxile kumlo noKuse.
UJerusalem, oneminyaka engamashumi amathathu ananye, uzakulwa nowayeyintshatsheli yoMzantsi Afrika kudidi lweminimumweight kwilinge lokuyikhusela isihlandlo sesithathu intshinga yakhe yeWorld Boxing Council (WBC) kudidi lwestrawweight.
“Asiyonto endigxile kuyo leyo. Masijongane nomlo omnye ngexesha,” utshilo uJerusalem, owayeyintshatsheli yeWBO kudidi lwestrawweight, ngethuba ethetha neDaily Tribune kwelasePhilippines.
Ethetha ngomlo noKuse, uJerusalem uphefumle wathi: “Yingozi enkulu ukumjongela phantsi umntu njengokuba ukuzithemba okugqithiseleyo kungakuphazamisa. Wonke umntu olwela intshinga yehlabathi usebenza nzima, kwaye ufuna ukuphumelela.”
UJerusalem waphumelela lentshinga yeWBC ngethuba wayebetha ummi waseJapan uYudai Shigeoka ngoMatshi kulonyaka ophelileyo. Ukhusele intshinga yakhe kuLuis Castillo waseMexico ngoSeptember nyakenye kunye noShigeoka kwiinyanga ezisixhenxe ezigqithileyo.
Kusenjalo, uKuse uzakulwela ukuba abeyimbethi-manqindi yokuqala kwilizwekazi i-Afrika elwa kudidi lwestrawweight nebeyinjinga yeWBC. Ziimbethi-manqindi zase-Asia, ezombindi noMzantsi Melika ekukudala zilawula kudidi lwestrawweight kwiWBC. – Monwabisi Jimlongo
