Liqale kakuhle iqela loMzantsi Afrika labaneminyaka engaphantsi kweshumi elinesixhenxe njengokuba libethe iBolivia ngamanqaku amathathu kwelinye kumdlalo wokuvula eDoha kwelaseQatar ngoMvulo emva kwemini ngokwexesha loMzantsi Afrika.
Amajimbos alwe kwamdaka iisali emva kokuba uSive Pama efumene ikhadi elibomvu ngomzuzu wamashumi amathathu anesithandathu. Elakhadi elibomvu alikhange liwatheze amandla amakhwenkwe oMzantsi Afrika njengokuba aye ahlasela ngamandla.
Amalinge oMzantsi Afrika avuzwe ngethuba u-Emile Witbooi efaka inqaku lokuqala ngomzuzu wamashumi amathathu anesibhozo. UNeo Bohloko ufake inqaku lesibini kwibhola ebivela ku-lwande Booysen.
Amakhwenkwe aseBolivia afumene inqaku elize ngequza likaJesús Maximiliano Maraude Cano kwibhola ebisuka echaphazeni ngomzuzu wamashumi asixhenxe anambini.
Kodwa Amajimbos ebengekagqibi njengokuba uShaun Els efake inqaku lesithathu kwibhola ebisuka kuBooysen ngomzuzu wamashumi alithoba. Ngoku amakhwenkwe kamqeqeshi uVela Khumalo uzakudlala noosotheko iQatar ngomkhono phambi kwentsimbi yesithathu ngokuhlwa kwangoLwesine.
