Ubuncinane zintlanu iimbethi-manqindi zabasetyhini ezizinzalelwane zaseMpuma Koloni ezizakubayinxalenye yetumente yamanqindi ezakubanjelwa kwiholo i-Eyethu Heritage, eMofolo Central, eSoweto, ebutsheni benyanga ezayo.
Umlo ophambili kuletumente ezakwenziwa yiVIP Promotions uzakube ingowentshinga yaseGauteng kwicandelo labasetyhini kudidi lwesuper-middleweight phakathi kweentshatsheli zamhlamnene eMzantsi Afrika uRita Mrwebi noKholosa Ndobayini ngoLwesihlanu umhla wesihlanu kuDisemba.
UMrwebi, oyinzalelwane yaseMthatha, wayeyinjinga yoMzantsi Afrika kwicandelo labasetyhini kudidi lwewelterweight, logama naye uNdobayini wakuQumbu selevelokuba yintshatsheli yaseMzantsi Afrika kudidi lwelightweight.
Bobabini uMrwebi noNdobayini baye bakulungela ukulwela intshinga yaseGauteng emva kokukuchitha iminyaka emininzi bengabahlali kwelona phondo elinabantu abaninzi eMzantsi Afrika.
Kwelinye icala, u-Azasakhe Jamani wasePhumlani, eMonti, uzakuvana amandla nentshatsheli yoMzantsi Afrika kwicandelo labasetyhini kudidi lwelightweight, uBonita van Jaarsveldt, kumlo wemijikelo esibhozo.
Ukanti, injinga yoMzantsi Afrika kudidi lwemini-flyweight uThobela Nyanda waseMdantsane uzakulwa nommi waseMalawi uHarriet Mtende kumlo onemijikelo esibhozo.
Kusenjalo, u-Asandiswa Nxokwana wakuCentane ulwa nowayeyintshatsheli yoMzantsi Afrika neWorld Boxing Federation (WBF) kudidi lwejunior-featherweight, uKabisile Tshabalala, kwimijikelo emithandathu.
