Imizuzu elishumi yokugqibela iye yabaluleka kakhulu kwi-Orlando Pirates njengokuba iquthise iChippa United ngamanqaku amabini eqandeni kumdlalo weBetway Premiership e-Orlando Stadium, eSoweto, ngokuhlwa ngoLwesibini.
Bekubonakala ngathi lomdlalo uzakuphela iliqanda macala omabini de ifolosi yePirates u-Evidence Makgopa wathi gqi, efaka inqaku kwibhola ebisuka kuDeon Hotto ngomzuzu wamashumi asibhozo.
IiBuccaneers zibethelele isikhonkwane sokugqibela kumkhumbi weeChilli Boya ngenqaku lika-Oswin Appollis kwibhola ebivela kuKabelo Dlamini kwixesha elongezwe ngusompempe.
