Ayikho evume ukugoba uphondo njengokuba iSiwelele FC sidlale ngokulingana ngenqaku elinye macala ngethuba sidlala neMamelodi Sundowns kumdlalo weBetway Premiership eDr Molemela Stadium, eMangaung, ngokuhlwa kwangoLwesithathu.
ISiwelele siphale phambili ngethuba uVincent Pule engcangcazelisa umnatha ngomzuzu wamashumi amabini anesixhenxe emva kwempazamo eyenziwe ngunozinti weSundowns uRonwen Williams kwibhola ebeyinikwa nguKegan Johannes.
Eqala ngqa ukufumana ibhola emva ngokungena njengelalela kwisiqingatha sesibini uLebogang Mothiba ufake inqaku lokulinganisa ngomzuzu wamashumi asixhenxe anesihlanu.
Izangxa zaseTshwane zigqebheke iduma elingatsitywa ntwala ngethuba umdlali wasesiswini uTeboho Mokoena efumana ikhadi elibomvu ngomzuzu wamashumi asibhozo anambini njengokuba ebefumana ikhadi elityheli isihlandlo sesibini.
Kusenjalo, iChippa United ibambene ngeqanda macala omabini neKaizer Chiefs eNelson Mandela Bay Stadium, eGqeberha, logama iSekhukhune United ibethe iMagesi FC ngenqaku elinye eqandeni eSeshego Stadium, ePolokwane.
Emva kokugxotha umqeqeshi wayo uGavin Hunt ebutsheni beveki, iDurban City itywatyushe i-Orbit College ngamanqaku amathathu eqandeni e-Olympia Park Stadium, eRustenburg.
Ukanti, ziyanda iinzingo zeStellenbosch FC njengokuba sibethwe ngamanqaku amabini kwelinye yiPolokwane City, e-Athlone Stadium, eKapa.
