Izinto zibonakala ziyihambela kakuhle intshatsheli yesizwe, uSharadene Fortuin, njengokuba ezakulwa okwesibini kwisithuba esingaphantsi kweenyanga ezine.
Emva kokuyikhusela ngempumelelo intshinga yakhe yoMzantsi Afrika kwicandelo labasetyhini kudidi lwentambanani ngokubetha uThema Zuma ngamanqaku eSN Boxing Gym, eDiep River, eKapa, kulenyanga ephelileyo, uFortuin uzakubuyela eqongeni e-Orient Theatre, eMonti, ngoMgqibelo umhla wamashumi amabini anesibhozo kuFebruwari.
“USharadene uthelekiswa sithi ngoku. Sifuna alwe rhoqo, akhusele intshinga yakhe. Ngokuqinisekileyo uzakulwa kwitumente yenyanga ezayo,” utshilo uLoyiso Magqaza, ongusomaqhuzu weGround Up Promotions.
Njengokuba lenzalelwane yaseMpofu ibikhusela intshinga yayo okwesithathu ngokubetha uZuma, ibiqala ngqa ukulwa ukususela ngoSeptemba 2023.
Kwaye ibikokwesibini uFortuin ebetha uZuma njengokuba wayembethile kumlo wentshinga eyayingenamntu kwi-International Boxing Organisation (IBO) Intercontinental kudidi lwentambanani ngoDisemba 2018. – Monwabisi Jimlongo
