IKaizer Chiefs isathe gqolo nokuphumelela njengokuba ibethe iMarumo Gallants ngenqaku elinye eqandeni kumdlalo weBetway Premiership eDr Molemela Stadium, eMangaung, ngokuhlwa kwangoLwesithathu.
Ibhola etsalwe kude nethe yayokungcangcazelisa umnatha isuka kwiquza likaGlody Lilepo waseDemocratic Republic of Congo ngomzuzu wamashumi amathandathu anesixhenxe ikhokelele kwinqaku elenze umahluko kulomdlalo.
Njengokuba ke ngoku Amakhosi sele edlale imidlalo elishumi elinesihlanu nelinganayo neyeMamelodi Sundowns ephezulu, iChiefs ikwindawo yesibini emva kokuqokelela amanqaku angamashumi amathathu xa ithelekiswa nezangxa zaseTshwane ezinamanqaku angamashumi amathathu anesibini.
