Kubonakele ngathi AmaZulu azakudlala ngokulingana neMamelodi Sundowns de kwathi gqi uMarcelo Allende engcangcazelisa umnatha, nto ke leyo eyenze ukuba iiBrazilians zibethe Usuthu ngenqaku elinye eqandeni kumdlalo weBetway Premiership eMoses Mabhida Stadium, eThekwini, ngokuhlwa kwangoLwesibini.
Ngenxa yalempumelelo ngenqaku lika-Allende nelingene ngomzuzu wamashumi asibhozo anesithathu, izangxa zaseTshwane zibuyele encochoyini kumanqwanqwa ePremiership.
Ukanti, iStellenbosch FC size ngemva ngethuba sibetha iKaizer Chiefs ngamanqaku amabini kwelinye komnye umdlalo weBetway Premiership obubanjelwe eFNB Stadium, eNasrec, eRhawutini.
Siphele isiqingatha sokuqala somdlalo Amakhosi enkqenkqeza phambili ngenqaku elinye eqandeni, nqaku elo elifakwe nguleFlavio da Silva kwibhola ebivela kuGlody Makabi Lilepo ngomzuzu wamashumi amathathu anesithandathu.
ULangelihle Phili ufake inqaku lokulinganisa kwimizuzu emithandathu siqalile isiqingatha sesibini kwibhola ebeyiphiwe nguDevin Titus. UTitus ubeliqhawe leStellies njengokuba efake inqaku lempumelelo ngomzuzu wamashumi asibhozo anesithathu emva kwebhola ebisuka ku-Ibraheem Olalekan Jabaar.
