Emva kweenyanga ezisixhenxe ephumelele intshinga ye-International Boxing Organisation (IBO) All-Africa kudidi lwejunior-featherweight kwicandelo labasetyhini, uSimamkele Tutsheni ubala iintsuku ngaphambi kokunikela umva uMzantsi Afrika, entingela kwelasePoland.
Enemilo nje esibhozo kudidi lwabahlawulwayo, uTutsheni uya ePoland ngenjongo enye – ukubuyela ekhaya eyintshatsheli ye-IBO kudidi lwejunior-featherweight kwicandelo labasetyhini njengokuba ezakulwa nommi welalizwe uMonika Laura Grzyb eMiasto Jastrzębie-Zdrój ngeCawa umhla weshumi elinesihlanu kuMatshi.
“Siyanduluka kusasa ngoLwesithathu weveki ezayo,” utshilo uFelix Venganai, ongumqeqeshi walentshatsheli ye-IBO All-Africa.
UTutsheni akakabethwa njengokuba eyiphumelele yosibhozo imilo yakhe, waze wanqumamisa oosisi abathathu. Lemilo ayiphumeleleyo iquka lo wentshinga ye-IBO All-Africa, awawuphumelela ngokubetha uCaleigh Swart -Emperors Palace, eKempton Park, Ekurhuleni, ngo-Agasti kulonyaka ophelileyo.
Kusenjalo, emva kokuguqukela emanqindini, uGrzyb, osinqe sakhe siseJastrzębie-Zdrój, waphumelela imilo elikhulu elinamashumi amahlanu kudidi lwabangahlawulwayo.
UGrzyb, oneminyaka engamashumi amathathu nowaphumelela iwonga le-2023 Best Polish Professional Female Boxer, uyiphumelele yolishumi elinanye imilo yakhe, enqumamise oosisi abathathu. – Monwabisi Jimlongo
