Umbutho webhola ekhatywayo eMzantsi Afrika, iSAFA ngamafuphi, ibhengezile kusasa ngoLwesibini ukuba iBanyana Banyana izakudlala imidlalo yobuhlobo emibini kunye neqela lesizwe laseJapan kwisithuba esingangeenyanga ezintathu.
Lemidlalo izakubayinxalenye yamalungiselelo omqeqeshi uDesiree Ellis njengokuba elungiselela itumente yeWomen’s Africa Cup of Nations (WAFCON), ezakudlalwa phakathi kukaJulayi no-Agasti.
Eliqela loMzantsi Afrika lizakuqubisana neJapan kumdlalo wokuqala eNagai Ballgame Field, e-Osaka, ngoMgqibelo umhla wesithandathu kuJuni. Kwiintsuku ezintathu ezilandelayo, lamaqela mabini azakungquzulana eJ-Green Sakai, e-Osaka.
Kusenjalo, iSAFA iphinde yabhengeza ukuba iBanyana izakudlala eminye imidlalo yobuhlobo emibini kulenyanga ezayo kunye neqela elingekabhengezwa.
