Ayimonwabisi uKhangelani Jack indlela elwe ngayo imbethi-manqindi yakhe uZolisa Batyi ngethuba lomlo wentshinga yoMzantsi Afrika kunye noLucky Hobyane e-Orient Theatre, eMonti, ngokuhlwa kwangeCawa.
Kodwa ke uJack, owaphumelela imbasa yokuba ngumqeqeshi wonkaya ka-2023, uyavuya kuba uBatyi ephumelele ngokunqumamisa uHobyane kumjikelo wesibhozo.
UBatyi wasEluxolweni, eNxarhuni, ukhusele intshinga yakhe ngempumelelo emva kokuba usompempe u-Allen Matakane emise umlo kwimizuzu emibini nemizuzwana engamashumi amahlanu anesibhozo.
“Ayindonwabisi indlela esilwe ngayo. Andikhange ndiyithande konke, konke. Kodwa ke, ndiyayamkela impumelelo ngaphantsi kweemeko nemicelimngeni esihlangabezane nayo ngethuba silungiselela lomlo, ingakumbi kweziveki zimbini zokugqibela,” utshilo uJack.
“Ndivuya kakhulu kuba sikwazile ukuyigcina intshinga yethu. Ndiyiqonda kakuhle into ebangele ukuba makalwe ngolwa hlobo. Sizakubuyela ekuziqeqesheni.”
Ibisisihlandlo sesibini uBatyi ekhusela intshinga yakhe emva kokubetha uJeff Magagane eNgoako Ramatlhodi Sports Complex, eSeshego, ePolokwane, ngoDisemba ka-2022.
