Abalandeli bamanqindi baseMonti bazakufumana ithuba lokubukela intandane yabo elinxele u-Azinga ‘Golden Boy’ Fuzile xa esilwa e-Orient Theatre okokuqala kwisithuba esingaphaya kweminyaka emibini njengokuba ebuyela eqongeni kulenyanga ezayo.
Lomfana owayeyinjinga yoMzantsi Afrika kudidi losiba uzakulwa noSebastianus ‘Iron Fists’ Natanael waseNamibia kwi-Orient Theatre yodumo ngeCawa umhla wamashumi amabini anesihlanu ku-Agasti.
UFuzile, ofince iminyaka engamashumi amabini anesibhozo kutsha nje, wagqibela ukulwa e-Orient Theatre ngethuba wayenqumamisa uRomeo Makwakwa waseMalawi kumjikelo wesithathu ngoJulayi 2022.
Kusenjalo, uNatanael owazalelwa e-Oshikushashipya, wakhe wabayinjinga yeWorld Boxing Association (WBA) Pan-African kunye neWorld Boxing Organisation (WBO) Africa kudidi losiba.
Lommi waseNamibia, oneminyaka engamashumi amathathu anesithathu, uzakutyelela eMzantsi Afrika okokuqala ukususela mhla wabethwa ngamanqaku nguSibusiso Zingange eCarousel Casino, eHammanskraal, ngoFebruwari 2019.
UNatanael, ozinze eWindhoek, uphumelele imilo elishumi elinesixhenxe, wanqumamisa amadoda alithoba, waze wabethwa kwimilo emine.
