Igqala lembethi-manqindi uBongani ‘Wonderboy’ Mahlangu uzakukhusela intshinga yakhe yoMzantsi Afrika kudidi lwejunior-featherweight kuSiyabulela Hem eMidrand ngoMgqibelo umhla wamashumi amathathu ananye ku-Agasti.
Umlo kaMahlangu noHem uzakugabulela izigcawu umlo wentshinga engenamntu kwi-International Boxing Organisation (IBO) junior-flyweight phakathi kukaMpumelelo Tshabalala noJunior Leandro Zareta wase-Argentina.
UMahlangu, oneminyaka engamashumi amane anesihlanu, uzakulinga ukukhusela intshinga yakhe ngempumelelo isihlandlo sesithathu ukususela mhla wayizuza emva kokunqumamisa u-Ayabonga Sonjica kumjikelo wesithandathu e-Orient Theatre, eMonti, ngoJulayi 2022. UMahlangu ugqibele ukhusela intshinga yakhe ngethuba ebetha uLuthando Mbumbulwana ngoSeptemba kulonyaka ophelileyo.
Kusenjalo, uHem uzakuya kumlo wakhe noMahlangu emva kokunqumamisa uLihle Gingxana kumjikelo wesithathu ngoJuni. UHem, oyintshatsheli yaseMpuma Koloni, uphumelele imilo emithandathu, enqumamise amadoda amane, wabethwa kumlo omnye, waphinda, wabambana komnye.
