Umqeqeshi wamanqindi uCollin ‘Nomakanjani’ Nathan uyiqinisekisile imihla yokunduluka kweembethi-manqindi zakhe uSivenathi ‘Special One’ Nontshinga noPhumelela ‘The Truth’ Cafu besingise kwelaseJapan.
UNontshinga, oyintshatsheli ye-International Boxing Federation (IBF) kudidi lwejunior-flyweight, uzakukhusela intshinga yakhe kummi waseJapan uMisamichi Yabuki, e-Aichi Sky Expo Convention Centre eTokoname ngoMgqibelo umhla weshumi elinambini ku-Okthobha.
UNontshinga kunye noyise uThembani Gopheni, uNathan, uBernie Pailman noHayden Jones bazakuntingela kwelaseJapan ngoLwesine umhla wesithathu ku-Okthobha, aze uCafu emke kwiintsuku ezimbini ezilandelayo.
UCafu, ozakucela umngeni kwinjinga yeWorld Boxing Organisation (WBO) kudidi lwejunior-bantamweight uKosei Tanaka e-Ariake Arena, eTokyo, ngoMvulo umhla weshumi elinesine ku-Okthobha, uzakunikela umva uMzantsi Afrika ephelekwe nguShannon Strydom, uLarry Wainstein weBoxing 5 Promotions kunye noMike Altamura wase-Australia.
UNathan, uPailman kunye noJones bazakuzigqithela eTokyo emva komlo kaNontshinga noYabuki, owayeyinjinga yeWorld Boxing Council (WBC) kudidi lwejunior-flyweight.
