UNhlanhla ‘Mount Kilimanjaro’ Tyirha, owayekuluhlu lweembethi-manqindi eziphambili ehlabathini nowayeyintshatsheli yesizwe, uzakulwa noPhumlani Maloni ethubeni kulenyanga.
Lentshatsheli yamhlamnene kudidi lwejunior-flyweight eMzantsi Afrika izakuvana amandla noMaloni kwitumente yeXaba Promotions eMonti ngoMgqibelo umhla wamashumi amabini anethoba kuMatshi.
UTyirha, oqeqeshwa nguMzamo ‘Chief’ Njekanye eDuncan Village, eMonti, ubekwa kwindawo yesithandathu kuluhlu lodidi lwejunior-flyweight, logama uMaloni, oyinzalelwane yaseMakhanda, ekwindawo yethoba kuluhlu lodidi lweminimumweight. Kwaye ke umlo wabo uzakuba kudidi lweminimumweight.
Lenzalelwane yaseMdantsane ikwiphulo kokuzama ukubuyela kuluhlu lwehlabathi eyayikulo ngaphambi kokunqunyanyiswa kumjikelo wesibhozo nguGeorge Kandulo waseMalawi ekuqaleni kukaJulayi 2023.
Kwamchana kakhulu uTyirha ukubethwa kwakhe nguKandulo njengokuba wakhutshelwa ngaphandle kuluhlu lweWorld Boxing Council (WBC), World Boxing Association (WBA), International Boxing Federation (IBF) nolweWorld Boxing Organisation (WBO).
