Impumelelo yakhe kumlo wakhe wokugqibela, mpumelelo leyo eze emva kwesithuba esingaphaya kweminyaka emibini, ibuyisele uNozipho Bell kuluhlu lweembethi-manqindi zasetyhini ezikwi-International Boxing Federation (IBF).
UBell, oyintshatsheli yoMzantsi Afrika kwicandelo labasetyhini kudidi lwejunior-lightweight, ngoku ubekwa kwindawo yesihlanu kuluhlu lwe-IBF. Lenjinga, eyinzalelwane yaseWalmer, eGqeberha, inqumamise u-Abongile Lubambo waseDuncan Village kumjikelo wesibhozo kwiholo iNangoza Jebe, eNew Brighton, eGqeberha, ebutsheni benyanga ephelileyo.
Ngoku, uBell kulindeleke ukuba akhusele intshinga yakhe yoMzantsi Afrika kuBernice Ferreira, obethe injinga yamhlamnene kwiWorld Boxing Federation (WBF) naseMzantsi Afrika kudidi lwentambanani uBukiwe Nonina eSandton kulenyanga ephelileyo.
Eqeqeshwa nguLonwabo Witbooi eMonti, uBell akakayikhuseli intshinga yakhe kususela mhla wabetha uMashudu Ramakwelo kwiholo iBabs Madlakane KwaNobuhle, eKariega, ngoDisemba 2022.
“UBell ubuyele kuluhlu lwe-IBF njengesithembiso sethu. Okwangoku asikaqiniseki malunga nokokuba uzakuyikhusela nini na intshinga yakhe yoMzantsi Afrika,” utshilo uWitbooi.
Owayesakulwela intshinga ye-International Boxing Organisation (IBO) neyeWorld Boxing Organisation (WBO) kwicandelo labasetyhini kudidi lwejunior-lightweight, uBell ngomnye weembethi-manqindi ezifumene iibhanti zazo kuBoxing South Africa (BSA) kwisidlo esasiququzelelwe nguMphathiswa weZemidlalo uGayton McKenzie ePitoli kulenyanga ephelileyo.
UBell sele ephumelele imilo emithandathu emva kokubethwa kwakhe ngoJulayi 2019 ngethuba esilwa kumlo wentshinga ye-IBO kudidi lwejunior-lightweight xa wayesilwa noTerri Harper eRotherham kwelase-United Kingdom (UK).
UBell wayebethwa okwesibini kumlo wentshinga yehlabathi kwisithuba esingaphantsi konyaka nanjengokuba wayebethwe ngu-Ewa Brodnicka wasePoland kumlo weWBO kudidi lwejunior-lightweight eLubin kwelasePoland ngo-Okthobha 2018. – Monwabisi Jimlongo
