Emva kokubethwa kukaMxolisi Zuma eNamibia kuloMgqibelo odlulileyo, sele kubhengeziwe ngoku ukuba uSiyabulela Hem uzakukhusela intshinga yakhe yoMzantsi Afrika kudidi lwejunior-featherweight kuVusi Ngcamu, obekwa kwindawo yesibini, kulenyanga ezayo.
Umlo kaHem nalenjinga yaseGauteng kudidi lwejunior-featherweight uzakubanjelwa e-Orient Theatre, eMonti, ngeCawa umhla wamashumi amabini anesibhozo kuSeptemba.
UHem uzakube ekhusela intshinga yakhe yoMzantsi Afrika isihlandlo sesibini njengokuba wabetha owayeyintshatsheli uBongani Mahlangu ngethuba ekhusela okokuqala ngoDisemba. Lo yayingumlo oyimpinda emva kokuba babelwile ngoSeptemba.
UHem, oyinzalelwane yaseDuncan Village, eMonti, uzakulwa okwesibini kulonyaka njengokuba wabetha ummi waseGhana uJohn Zile kumlo wentshinga yeWorld Boxing Organisation (WBO) Youth kudidi lwejunior-featherweight ngo-Epreli.
Kwelinye icala, uNgcamu walwa ngokulingana nommi waseDemocratic Republic of Congo ozinze eKapa u-Ardy Katompa ngoJanyuwari walonyaka.
Kusenjalo, uZuma, obekwa kwindawo yokuqala, unqunyanyiswe kumjikelo wesithandathu yimbethi-manqindi yaseNamibia uFilipus Nghitumbwa kumlo wentshinga yeWBO Global kudidi lwejunior-featherweight eWindhoek.
